1. yānidha bhūtāni samāgatāni│bhummāni vā yāni vā antalikkhe│
sabbe va bhūtā sumanā bhavantu│athopi sakkacca suṇantu bhāsitaṃ│
2. tasmā hi bhūtā nisāmetha sabbe│mettaṃ karotha mānusiyā pajāya│
divā ca ratto ca haranti ye baliṃ│tasmā hi ne rakkhatha appamattā│
3. yaṃ kiñci vittaṃ idha vā huraṃ vā│saggesu vā yaṃ ratanaṃ paṇītaṃ│
na no samaṃ atthi tathāgatena│idampi buddhe ratanaṃ paṇītaṃ│etena saccena suvatthi hotu.
4. khayaṃ virāgaṃ amataṃ paṇītaṃ│yadajjhagā sakyamunī samāhito│
na tena dhammena samatthi kiñci│idampi dhamme ratanaṃ paṇītaṃ│
etena saccena suvatthi hotu│
5. yaṃ buddhaseṭṭho parivaṇṇayī suciṃ│samādhiṃ ānantarikaññamāhu│
samādhinā tena samo na vijjati│idampi dhamme ratanaṃ paṇītaṃ│
etena saccena suvatthi hotu│
6. ye puggalā aṭṭha sataṃ pasatthā│cattāri etāni yugāni honti│te dakkhiṇeyyā sugatassa sāvakā│etesu dinnāni mahapphalāni│
Idampi saṅghe ratanaṃ paṇītaṃ│etena saccena suvatthi hotu│
7. ye suppayuttā manasā daḷhena│nikkāmino gotamasāsanamhi│
te pattipattā amataṃ vigayha│laddhā mudhā nibbutiṃ bhuñjamānā│
idampi saṅghe ratanaṃ paṇītaṃ│etena saccena suvatthi hotu│
8. yathindakhilo paṭhaviṃ sito siyā│catubbhi vātehi asampakampiyo│
tathūpamaṃ sappurisaṃ vadāmi│yo ariyasaccāni avecca passati│
Idampi saṅghe ratanaṃ paṇītaṃ│etena saccena suvatthi hotu│
9. ye ariyasaccāni vibhāvayanti│gambhirapaññena sudesitāni│
kiñcāpi te honti bhusappamattā│na te bhavaṃ aṭṭhamam ādiyanti│
idampi saṅghe ratanaṃ paṇītaṃ│etena saccena suvatthi hotu│
10. sahāvassa dassanasampadāya│tayassu dhammā jahitā bhavanti│
sakkāyadiṭṭhi vicikicchitañca│sīlabbataṃ vā pi yadatthi kiñci │
11. catuhapāyehi ca vippamutto│chaccābhiṭhānāni abhabbo kātuṃ│
idampi saṅghe ratanaṃ paṇītaṃ│etena saccena suvatthi hotu│
12. kiñcāpi so kammaṃ karoti pāpakaṃ│kāyena vācā uda cetasā vā│
abhabbo so tassa paṭicchādāya│abhabbatā diṭṭhapadassa vuttā│
idampi saṅghe ratanaṃ paṇītaṃ│etena saccena suvatthi hotu│
13. vanappagumbe yathā phūssitagge│gimhāṇa māse paṭhamasmiṃ gimhe│tathūpamaṃ dhammavaraṃ adesayī│nibbānagāmiṃ paramaṃ hitāya│idampi buddhe ratanaṃ paṇītaṃ│etena saccena suvatthi hotu│
14.varo varaññū varado varāharo│anuttaro dhammavaraṃ adesayi│
idampi buddhe ratanaṃ paṇītaṃ│etena saccena suvatthi hotu│
15. khīṇaṃ purāṇaṃ navaṃ natthi sambhavaṃ│
virattacittāāyatike bhavasmiṃ│
te khīṇabijā avirūḷhichandā│nibbanti dhirā yathāyaṃ padīpo│
idampi saṅghe ratanaṃ paṇītaṃ│etena saccena suvatthi hotu│
16. yānidha bhūtāni samāgatāni│bhummāni vā yāni vā antalikkhe│
tathāgataṃ devamanussapūjitam│buddhaṃ namassāma suvatthi hotu│
17. yānidha bhūtāni samāgatāni│bhummāni vā yāni vā antalikkhe│
tathāgataṃ devamanussapūjitam│dhammaṃ namassāma suvatthi hotu│
18. yānidha bhūtāni samāgatāni│bhummāni vā yāni vā antalikkhe│
tathāgataṃ devamanussapūjitam│saṅghaṃ namassāma suvatthi hotu │ |