(verse 1) Manopubbaṅgamā dhammā manoseṭṭhā manomayā
Manasā ce paduṭṭhena bhāsati vā karoti vā
Tato naṃ dukkhamanveti cakkaṃ'va vahato padaṃ.
(verse 2) Manopubbaṅgamā dhammā manoseṭṭhā manomayā
Manasā ce pasannena bhāsati vā karoti vā
Tato naṃ sukhamanveti chāyā'va anapāyinī.
(verse 7) Subhānupassiṃ viharantaṃ indriyesu asaṃvutaṃ
Bhojanamhi amattaññuṃ kusītaṃ hīnavīriyaṃ
Taṃ ve pasahati māro vāto rukkhaṃ'va dubbalaṃ.
(verse 8) Asubhānupassiṃ viharantaṃ indriyesu susaṃvutaṃ
Bhojanamhi ca mattaññuṃ saddhaṃ āraddhavīriyaṃ
Taṃ ve nappasahati māro vāto selaṃ'va pabbataṃ.
(verse 361) Kāyena saṃvaro sādhu sādhu vācāya saṃvaro
Manasā saṃvaro sādhu sādhu sabbattha saṃvaro
Sabbattha saṃvuto bhikkhu sabbadukkhā pamuccati.
(verse 364) Dhammārāmo dhammarato dhammaṃ anuvicintayaṃ
Dhammaṃ anussaraṃ bhikkhu saddhammā na parihāyati.
(verse 366) Appalābho'pi ce bhikkhu salābhaṃ nātimaññati 366
Taṃ ve devā pasaṃsanti suddhājīviṃ atanditaṃ.
(verse 367) Sabbaso nāmarūpasmiṃ yassa natthi mamāyitaṃ 367
Asatā ca na socati sa ve bhikkhū'ti vuccati.
(verse 368) Mettāvihārī yo bhikkhū pasanno buddhasāsane 368
Adhigacche padaṃ santaṃ saṅkhārūpasamaṃ sukhaṃ.
(verse 381) Pāmojjabahulo bhikkhu pasanno buddhasāsane
Adhigacche padaṃ santaṃ saṅkhārūpasamaṃ sukhaṃ.
(verse 382) Yo have daharo bhikkhu yuñjati buddhasāsane
So imaṃ lokaṃ pabhāseti abbhā mutto'va candimā.
(verse 79) Dhammapīti sukhaṃ seti vippasannena tejasā
Ariyappavedite dhamme sadā ramati paṇḍito.
(verse 81) Selo yathā ekaghano vātena na samīrati
Evaṃ nindāpasaṃsāsu na samiñjanti paṇḍitā.
(verse 21) Appamādo amatapadaṃ pamādo maccuno padaṃ
Appamattā na mīyanti ye pamattā yathā matā.
(verse 22) Etaṃ visesato ñatvā appamādamhi paṇḍitā
Appamāde pamodanti ariyānaṃ gocare ratā.
(verse 252) Sudassaṃ vajjamaññesaṃ attano pana duddasaṃ
Paresaṃ hi so vajjāni opuṇāti yathā bhūsaṃ
Attano pana chādeti kaliṃ'va kitavā saṭho.
(verse 165) Attanā'va kataṃ pāpaṃ attanā saṃkilissati
Attanā akataṃ pāpaṃ attanā'va visujjhati
Suddhi asuddhi paccattaṃ nāññamañño visodhaye.
(verse 121) Mā'pamaññetha pāpassa na mantaṃ āgamissati
Udabindunipātena udakumbho'pi pūrati
Pūrati bālo pāpassa thokathokampi ācinaṃ.
(verse 122) Mā'pamaññetha puññassa na maṃ taṃ āgamissati
Udabindunipātena udakumbho'pi pūrati
Pūrati dhīro puññassa thokathokampi ācinaṃ.
(verse 315) Nagaraṃ yathā paccantaṃ guttaṃ santarabāhiraṃ
Evaṃ gopetha attānaṃ khaṇo vo mā upaccagā
Khaṇātītā hi socanti nirayamhi samappitā.
(verse 50) Na paresaṃ vilomāni na paresaṃ katākataṃ
Attano'va avekkheyya katāni akatāni ca.
(verse 51) Yathāpi ruciraṃ pupphaṃ vaṇṇavantaṃ agandhakaṃ
Evaṃ subhāsitā vācā aphalā hoti akubbato.
(verse 52) Yathāpi ruciraṃ pupphaṃ vaṇṇavantaṃ sagandhakaṃ
Evaṃ subhāsitā vācā saphalā hoti pakubbato.
(verse 53) Yathāpi ppupharāsimhā kayirā mālākuṇe bahū
Evaṃ jātena maccena kattabbaṃ kusalaṃ bahuṃ.
(verse 25) Uṭṭhānenappamādena saññamena damena ca
Dīpaṃ kayirātha medhāvī yaṃ ogho nābhikīrati.
(verse 100) Sahassampi ce vācā anatthapadasaṃhitā
Ekaṃ atthapadaṃ seyyo yaṃ sutvā upasammati.
(verse 101) Sahassampi ce gāthā antthapadasaṃhitā
Ekaṃ gāthāpadaṃ seyyā yaṃ sutvā upasammati.
(verse 103) Yo sahassaṃ sahassena saṅgāme mānuse jine
Ekañca jeyya attānaṃ sa ve saṅgāmajuttamo.
(verse 146) Ko nu hāso kimānando niccaṃ pajjalite sati
Andhakārena onaddhā padīpaṃ na gavessatha.
(verse 153) Anekajāti saṃsāraṃ sandhāvissaṃ anibbisaṃ
Gahakārakaṃ gavesanto dukkhā jāti punappunaṃ.
(verse 154) Gahakāraka diṭṭho'si puna gehaṃ na kāhasi
Sabbā te phāsukā bhaggā gahakauṭaṃ visaṅkhitaṃ
Visaṅkhāragataṃ cittaṃ taṇhānaṃ khayamajjhagā.
(verse 89) Yesaṃ sambodhiaṅgesu sammā cittaṃ subhāvitaṃ
Ādānapaṭinissagge anupādāya ye ratā
Khīṇāsavā jutimanto te loke parinibbutā.
(verse 207) Bālasaṅgatacārīhi dīghamaddhāna socati
Dukkho bālehi saṃvāso amitteneva sabbadā
Dhīro ca sukhasaṃvāso ñātīnaṃ'va samāgamo.
(verse 259) Na tāvatā dhammadharā yāvatā bahu bhāsati
Yo ca appampi sutvāna dhammaṃ kāyena passati
Sa ve dhammadharo hoti yo dhammaṃ nappamajjati.
(verse 423) Pubbenivāsaṃ yo'vedī saggāpāyaṃ ca passati
Atho jātikkhayaṃ patto abhiññāvosito muni
Sabbavositavosānaṃ tamahaṃ brūmi brāhmaṇaṃ.
(verse 188) Bahū ve saraṇaṃ yanti pabbatāni vanāni ca
Ārāmarukkhacetyāni manussā bhayatajjitā.
(verse 189) Netaṃ kho saraṇaṃ khemaṃ netaṃ saraṇamuttamaṃ
Netaṃ saraṇamāgamma sabbadukkhā pamuccati.
(verse 190) Yo ca buddhañca dhammañca saṅghañca saraṇaṃ gato
cattāri ariyasaccāni sammappaññāya passati.
(verse 191) Dukkhaṃ dukkhasamuppādaṃ dukkhassa ca atikkamaṃ
Ariyañcaṭṭhaṅgikaṃ maggaṃ dukkhūpasamagāminaṃ.
(verse 192) Etaṃ kho saraṇaṃ khemaṃ etaṃ saraṇamuttamaṃ
Etaṃ saraṇamāgamma sabbadukkhā pamuccati.
(verse 273) Maggānaṭṭhaṅgiko seṭṭho saccānaṃ caturo padā
Virāgo seṭṭho dhammānaṃ divipadānaṃ ca cakkhumā.
(verse 274) Eso'va maggo natthañño dassanassa visuddhiyā
Etaṃ hi tumhe paṭipajjatha mārassetaṃ pamohanaṃ.
(verse 276) Tumhehi kiccaṃ ātappaṃ akkhātāro tathāgatā
Paṭipannā pamokkhanti jhāyino mārabandhanā.
(verse 109) Abhivādanasīlissa niccaṃ vaddhāpacāyino
Cattārā dhammā vaḍḍhanti āyu vaṇṇo sukhaṃ balaṃ.
(verse 182) Kiccho manussapaṭilābho kicchaṃ macchāna jīvitaṃ
Kicchaṃ saddhammasavanaṃ kiccho buddhānaṃ uppādo.
(verse 194) Sukho buddhānaṃ uppādo sukhā saddhammadesanā
Sukhā saṅghassa sāmaggi samaggānaṃ tapo sukho.
|